【歐心鬥國】德法醒未？

我思故我在

【now.com體育】噚晚上線已決出3隊入8強，今晚終輪到下線嘅列強出場。法國同德國，睇牌面必高於各自嘅對手，但兩隊波喺分組賽表現未算對辦，嚟到16強會唔會終於見真章呢？ 撰文：球十三

決賽周展開前，法德可以話係奪冠大熱，一隊係東道主，另一隊就係兩年前世盃冠軍，有期望好正常。結果，兩隊都喺分組賽順利首名出線，但稱唔上有霸氣。先講法國，頭兩場雖然攞足6分，但都係去到尾段先贏到，而且進攻唔流暢，行軍好慢，直到最後一場對瑞士，比數雖然0:0，但輪換下有啲改善；冇皮耶嘅上半場，反而放生咗普巴，所以今場好考迪甘斯點樣調配旗下猛將，對住休息較少嘅愛爾蘭，踢番一場有說服力嘅勝仗。

至於德國更加冇態，分組賽3場入得3球，完全同近10年每逢大賽就精神奕奕，兩個樣子。鋒線疲弱係一個問題，最緊要踢得亦冇乜生氣，但當然路維點諗，我哋唔知，係唔係暗藏殺著，今場對斯洛伐克有分曉。

至於凌晨3點尾場，係比利時惡鬥匈牙利。後者分組賽一場都未輸過，仲要同葡萄牙踢成3:3後，勇奪首名，士氣必盛，就算比利時兵多將廣，都一定唔敢掉以輕心。噚晚嘅瑞士，4場比賽法定時間未輸過就出局，希望匈牙利唔好成為第2隊瑞士。

今日秩序
法國 VS 愛爾蘭
now651台26/06 21:00直播
/ 傷兵 /
/ 停賽 /

德國 VS 斯洛伐克
now651台26/06 00:00直播
/ 傷兵 /
/ 停賽 /

匈牙利 VS 比利時
now651台27/06 03:00直播
/ 傷兵 /
/ 停賽 /