十大公共交通工具內的怪現象 - 港人搭車醜態
本帖最後由 hmbb 於 4-8-2011 03:22 編輯十大公共交通工具內的怪現象 - 港人搭車醜態
讓指甲飛
非正式統計，喺公共交通上剪指甲係最令人討厭嘅行為。重點係唔知道對方剪落來嘅指甲，會飛去邊個方向。指甲藏滿細菌，喺公眾地方剪指甲會散播細菌 o架。
打機聽歌
巴士、火車、地鐵，各式各樣嘅聲音提示，已令到人非常煩厭，偏偏仲有人鍾意打開 speaker播音樂、打機，為人多擠逼嘅車廂再添噪音。
柱男柱女
搭地鐵不時都會見到小朋友利用扶手柱作出好多高難度旋轉，滋擾他人。不過啲大人仲衰格，成日都唔理你係唔係已緊握扶手，一嘢成個人挨過嚟，甚至壓住你隻手。
大聲講電話
「你有壓力，我有壓力，你做乜挑釁我呀？」巴士阿叔一夜成名，好多人仲識得背晒阿叔演講全文，其實件事嘅起因，係一個後生仔勸佢講電話細聲少少。
車廂困獸鬥
無論港鐵點樣宣傳都冇用，好多上車嘅人唔等乘客落晒車就逼入去，搞到入面嘅人落唔到車。上到車嘅人為咗方便落車，又唔肯企入啲，搞到出面嘅人入唔到。
表演化妝
港女鍾意喺公共交通表演化妝絕學，唔係搽下唇膏咁簡單，而係喺搖擺不定、人來人往嘅車廂內畫眉、夾眼睫毛、搽睫毛液、擠暗瘡等等，不知幾咁大方得體。
當眾大小便
好多乘客家長對廁所嘅概念，仲係停留喺原始人逐水草而居嘅階段，於是乎小朋友喊住話急屎急尿，就抱佢屙落垃圾桶或者月台下面，好啲嘅就用個膠袋。
一人霸兩位
早輪揚名網絡嘅賜座男，其實只係冰山一角。好多人都鍾意將隨身物品放喺旁邊座位，就算全車滿座，都唔肯拎起，呢種劣行喺巴士比較常見。
飛腳過河
大部份巴士嘅下層後座，座位設計都係面對面，乘客貪舒服，好多時都將對腳放上對面座位，就算對鞋幾污糟都話之你，後一個乘客就領晒嘢。
人肉按摩椅
喺巴士或小巴上，突然感到椅背有一對滑輪移上移落。原來係後座嘅乘客將對膝頭頂住椅背，呢個姿勢睇來幾舒服，但係長遠對脊椎一定唔好，而前座乘客亦都受苦。
我無中 ;ppp
邊樣你覺得OK? 我覺得化妝, 我幾中意睇人化妝, 而且又唔影響我, 我自己最多都是茶hand cream, 潤唇膏. 其他真是好黑人憎! 不過其係咪多數都是上左年紀的人/新移民呀...
轉載出自Lady Qooza Forum 試果1-2個- -... 大小便果個未見過-.-
頁:
[1]