親西判官助降魔 費SIR嬲爆發晒狂
本帖最後由 C小旋風 於 7-3-2013 18:24 編輯皇馬靠爭議紅牌闖8強
土耳其球證卡基粉碎曼聯三冠王美夢！歐聯十六強次回合「魔皇戰」被一個爭議判決影響賽果，「親西班牙」判官卡基喺56分鐘驅逐曼聯翼鋒拿尼，連皇馬教頭莫連奴都話唔合理，紅魔鬼寡不敵眾下主場反輸1比2，兩回合計輸2比3出局。曼聯將帥狂鬧球證錯判，全軍上下谷住一肚氣結束今屆歐聯之旅。
拿尼領紅贏變輸
「魔皇戰」首回合踢成1比1，曼聯回師主場續以穩守突擊戰術對抗皇馬，中堅尼曼查維迪上半場頭槌攻門中柱，換邊後僅3分鐘更搞到沙治奧拉莫斯擺烏龍先開紀錄。賽事轉捩點喺56分鐘出現，兩軍17號仔爭奪五五波，拿尼出飛腳，艾比路亞用心口，前者踢中對手，兩人雙雙倒地，球證卡基冷靜走向拿尼舉起紅牌，激到費Sir彈起，佢即時由後備席走向第四球證瘋狂投訴，鬧到面紅耳赤，非常激動。紅魔鬼打少個形勢急轉直下，皇馬先喺66分鐘由莫迪歷射入世界波扳平，3分鐘後再由C朗門前撞入奠勝，直接判咗曼聯死刑。
球證卡基變成今場主角，皇馬教頭莫連奴賽後談及爭議紅牌時表示：「呢次同比比兩年前對巴塞被逐情況相似，費Sir反應同我當時一樣，今日打得好嗰隊（曼聯）輸咗，我哋嘅表現唔配贏波。」卡基上季兩次執法紅魔鬼賽事，佢哋喺歐聯賽和賓菲加，歐霸盃不敵畢爾包，唔多老利。
里奧拍掌寸球證
卡基仲曾經兩次針對車路士，上季歐聯四強次回合對巴塞時驅逐泰利，上年尾喺世冠盃決賽出示紅牌趕咗加利卡希爾出場，判決同樣惹人爭議。卡基更同葡萄牙足總有牙齒印，佢上年執法歐國盃四強葡萄牙對西班牙賽前，葡國足總指土耳其同西班牙足總關係非比尋常，批評賽會搵卡基執法，今次佢辣手趕拿尼出場，唔通有心報仇？
費格遜眼白白畀球證粉碎三冠王美夢，嬲到要搵助教費蘭做代表出席記招，費蘭透露老費情緒失控：「費Sir完全發晒狂，佢嘅狀態唔適合再講場波，球證呢個判決真係黐線，完全扭轉局勢，依家教頭同班兵都發晒癲喇！」紅魔鬼兩位老將傑斯同里奧費迪南賽後衝向球證卡基理論，前者破口大罵，後者就寸寸貢對住佢鼓掌，兩人隨時被秋後算帳。至於「受害人」拿尼就成為傳媒追訪對象，佢黑口黑面表示：「上面落咗柯打乜都唔講得！」
曼聯惟有疊埋心水爭做國內雙料冠軍，佢哋嚟緊周一凌晨會同車路士喺足總盃八強碰頭，賽會任命曼聯「御用球證」韋比執法，佢出名係「魔粉」，相信唔會再作出爭議判決激老費啩！
沙比阿朗素：
呢個紅牌係好難嘅決定，不過面對十人應戰嘅球隊可能仲辛苦。
高柏尼（曼城隊長）：
呢個犯規永遠冇可能畀紅牌！
祖爾巴頓（馬賽中場）：
紅牌簡直係開玩笑，球證破壞咗一場歐洲最頂級對決。
莫耶斯（愛華頓領隊）：
費格遜嬲得有道理，呢張紅牌改變咗整場比賽。
堅尼（前曼聯隊長）：
我踢波嗰陣會諗有冇做到啲乜會攞紅牌，我認為球證判決正確。
夏文（前利物浦中場）：
拿尼只係想攞個波，佢根本睇唔到對手，黃牌都唔應該畀。
連尼加（前英格蘭射手）：
難以置信球證會畀紅牌，係一個愚蠢判決。
加歷查（前英超資深球證）：
判決明顯太苛刻，極其量只係一面黃牌。
我認為紅牌一定架呀 人地對曼聯咁即時都紅牌
來自波經
頁:
[1]