皇馬閃電殺仁

緋櫻緋雨

歐聯四強次回合皇家馬德里主場對拜仁慕尼黑，「銀河艦隊」皇馬近期威震「宇宙」，作客都贏到「地上最強」巴塞，試問世間上仲有邊隊可以阻擋到佢哋前進？皇馬要贏拜仁並唔困難，難怪主W熱爆燈。基於皇馬首回合輸一比二，Mic少相信佢哋今仗一開波就狂攻，爭取盡快收復失地，投注首選1.92倍皇馬「半場主勝」。（有線61及201台周四凌晨2時45分直播）


皇馬上仗西甲作客擊敗巴塞，聯賽冠軍基本上已成囊中物，可以更專注於歐聯；最重要係打破近年被巴塞食住嘅局面，大大提升球隊士氣同信心。高手過招，雙方技術、體能及戰術等基本功皆接近，球員鬥志及士氣往往先至係決定勝負關鍵，皇馬喺國家打吡一吐烏氣信心倍增，正好挾餘威贏埋拜仁。


或者有人會覺得「銀河艦隊」有一粒作客入球在手，贏一比○都可以晉級，唔需要太進取。Mic少認為咁諗大錯特錯，若然太滋油，畀拜仁企穩陣腳，到時要入波就更難。莫連奴身為頂級名帥，當然明白呢個道理，相信會採取「閃電戰」，取得領先優勢，將壓力推番畀拜仁。以C朗等優秀進攻人腳，皇馬要半場領先拜仁，機會樂觀。

拜仁中堅靠唔住

拜仁首回合喺主場贏得非常險，證明級數始終同皇馬有距離，去到巴拿貝球場，恐怕都唔敢輕舉妄動。仲有一點要留意，拜仁剛失落聯賽錦標，歐聯成為球隊今季成敗關鍵，難免加重球員今場心理壓力，尤其係拜仁一對中堅謝路美保定及畢斯杜巴只屬平庸之輩，隨時承受唔到呢種壓力，喺開波初段犯錯失波。


不過德國球隊以後勁凌厲見稱，拜仁或有力喺下半場拉近紀錄，皇馬未必可以贏得多，「讓球主勝」風險高，權衡回報同風險後，皇馬「半場主勝」屬首選。
http://football.on.cc/football/new/20120425/fbnewa0101x0.html