破解 iPhone變磚流言

hmbb

                                                        

如果你係 iPhone用家，最近可能都收過朋友傳嚟短訊，話如果收到號碼 2541 2811來電千祈唔好接聽，否則一接就會死機變「磚」，連蘋果電腦都救唔番，仲叫你將呢個消息通知用 iPhone親朋戚友。

墮入連鎖短訊惡作劇                                                                                                                                                                                                                                                          
                                

年多前好多人收到同香港郵政極相似嘅卡紙，有人跟指示打卡上嘅 2541 2811電話，結果俾人套取個人資料。

                                       
                                                                        
                                                               

死咗機所有資料化為烏有， iPhone用家唔驚就假，好自然會諗 2541 2811呢個電話號碼，究竟乜嘢來頭咁惡。只要 Google吓，就會發現呢個電話號碼多年前，曾涉及一單假扮香港郵政套取市民個人資料事件。呢個號碼既然有一段黑暗歷史，收到短訊嘅人難免又信多幾成，因此即時將短訊轉發親友，點知咁就墮入咗連鎖短訊惡作劇。
為揭開 iPhone變磚之謎，八方身先士卒致電 2541 2811，發現訊號長響，似乎已經停用。八方再致電蘋果電腦技術支援熱線查詢，都未講完件事，職員已經用好無奈嘅語氣話：「邊有可能一接電話就死機，如果咁嚴重官網一早通知客戶啦！」睇嚟呢個短訊確實嚇親唔少 iPhone用家，搞到 CS應接不暇煩到癲。
香港電腦保安事故協調中心經理古煒德對呢個惡作劇短訊都略有所聞，佢話至今都冇收過 iPhone因此死機嘅報告，指事件好似以前流傳嘅連鎖電郵，其中一個主要特徵係叫接受者將訊息盡量傳開去。古煒德話呢種惡作劇會令用家以幾何級數咁傳送短訊，耗費大量網絡資源，認真不該。

                                                                                                                                黑客可癱瘓智能手機咁接一個電話有冇可能癱瘓智能手機呢？港大電機電子工程學系副教授張星煒話技術上絕對做得到，但先決條件係手機已經被安裝「黑心程式」，預設接到指定來電號碼便會令手機死機。張教授話由於所有 iPhone Apps推出前都必須通過蘋果電腦審核，因此出現呢種黑心程式嘅機率微乎其微，佢又話黑客如果用死一個號碼嚟搞事，好容易俾人追查到同防備，唔相信有黑客會咁戇居。
八方記得過去出現嘅惡作劇連鎖電郵，分別有某大型傢俬店有拐子佬，以及某茶餐廳出產「精液飯」等，被中傷嘅機構都在行內頗有名氣。 iPhone 4自去年 8月推出以來一直熱賣，原價 4,988元嘅 16GB版，行貨近日炒價突破 7,100蚊。人氣咁勁，又難怪樹大招風