勒夫嬲爆嚴令捉內鬼

緋櫻緋雨

鬥希臘變陣機密提前曝光

洩密風暴席捲歐國盃，繼英格蘭同荷蘭等中招後，最新受害者係4強分子德國。領隊勒夫上場對希臘嘅正選陣容變動機密，竟然喺開賽前6小時就提前曝光。事後嬲爆嘅勒夫已經勒令必須查出洩密內鬼，同時為免再受滋擾，決定為球隊更改行程，假如殺入決賽，將會喺4強賽後即晚由華沙飛返德國備戰，到比賽日前夕先飛赴烏克蘭準備。

德國喺8強對希臘之戰前線大變陣，收起馬里奧高美斯、普多斯基同湯馬士梅拿，改以高路斯、馬高列奧斯同舒賀爾尼擔正。領隊勒夫本來諗住可以殺希臘一個措手不及，可惜原定開賽前先會公布嘅正選陣容，居然早喺當日下午已經畀德國《圖片報》、《世界報》等傳媒披露，足足較正常時間提早咗6粒鐘。

免受滋擾如入決賽返德備戰

勒夫事後忿忿不平咁話：「名單被洩露完全出乎我意料，咁會令對手可以提早作出調整，進行針對性部署。我都唔知個名單究竟點樣傳出去，最大機會應該係球員同佢哋經理人講起啩。佢哋有時又會因為對安排覺得開心或唔開心，打番屋企同家人或朋友傾。」

舒賀爾尼證實勒夫已經同球員傾過呢個問題：「佢（勒夫）真係好火滾，我哋都唔知名單點解會洩露，我真係想像唔到球隊之中有內鬼。」據知，勒夫已經安排親信去徹查今次洩密風波。

「小豬」 根度簡足踝皆有傷

為免再中招，據同德國足總關係密切嘅《法蘭克福匯報》報道，假如德國喺本周四嘅準決賽順利晉級，當晚比賽後大軍會即時由華沙飛返德國，徹底告別佢哋波蘭格但斯克嘅大本營，到決賽前一日先飛去烏克蘭基輔應戰，希望藉住喺自己祖國做備戰，可以將洩密風險減到最低。

除咗要防範洩密，勒夫仲有樣嘢頭痛，就係防中根度簡尋日練波受傷，左足踝包到糭咁，消息話今屆隨時唔使再預佢喎！更慘係連「小豬」舒韋恩史迪加嘅足踝都有事，雖然唔算太嚴重，但點都影響表現啫。

http://football.on.cc/cnt/news/newc/20120625/fbnewc0113x0.html

我思故我在

根度簡影響就唔大既

埃墳仔是也

其實如果小豬有咩問題出根度簡都應該唔錯....可能會成名,希望佢快D好番~